КАНОН МОЛЕБНЫЙ ЧУДОТВОРНОЙ ИКОНЕ ПРЕСВЯТОЙ БОГОРОДИЦЫ, ИМЕНУЕМОЙ ХРИСАФИТИССА

 

Всечестная и чудотворная икона,

имеющая благодать исцеления страждущих от психологических

и неврологических проблем и печалей

Издано при участии

архимандрита Дорофея,

игумена и духовника обители Фемелы

 

Афины 2011 г.

 

КАНОН МОЛЕБНЫЙ

ЧУДОТВОРНОЙ ИКОНЕ ПРЕСВЯТОЙ БОГОРОДИЦЫ

ХРИСАФИТИССА

 

Всем благочестивым христианам. 

Всечестное имя Пресвятой Богородицы и Пречистой Матери Христа Спасителя, лишь при одном упоминании его, исполняет сердца благочестивых и православных христиан, любящих Ее, божественною радостию, веселием, утешением и духовным ликованием.

        Величайшее почитание Её святаго и богочтимого лика, неизмеримые, свершающиеся в различных местах Её сверхъестественные чудеса, время от времени случающиеся обретения и явления различных чудотворных Её икон, стали причиной того, что Её иконам даются различные имена. Из чтимых сих икон, икона Пресвятыя Богородицы, называемая «Хрисафитисса», честное изображение которой было найдено в византийской крепости Монемвасия, где находится и Её чудотворный источник, восприяло особую благодать от Бога, в Троице славимаго, как имеющая величайшее дерзновение исцелять психологические и неврологические проблемы христиан, страдающих от таких трудных болезней, так что Она прекращает скорби, а также дарует супругам чадородие и детей мужеского пола. Особенное же благоговение к Ее честной иконе написавшего сии смиренные слова, явилось причиною того, что мы призвали преподобнейшую игумению священной обители святаго Иерофея Мегарского, монахиню Исидору, имеющую дар от Бога составлять священные гимны, чтобы она составила сей молебный канон, дабы каждая душа, а в особенности же страждущие от вышеописанных заболеваний, воспевали его и призывали скорую помощь Богородицы с горячей верой, имея твердую надежду, что Пресвятая Дева «Хрисафитисса» скоро поспешит, даруя им исцеление и яже ко спасению прошения.

        Было замечено, что там, где находятся цветные копии Ея честныя иконы, совершались и всегда совершаются бесчисленные чудеса.

        У кого бы ни оказался сей молебный канон, и кем бы он ни воспевался, пусть помолятся об издателе его, дабы молитвами Благодатныя Девы Марии получил он Божественную милость в оный страшный день Суда.

 

22.10. 2011.

День св. равноап. Аверкия,

Епископа Иерапольского, чудотворца

 

С любовью о Господе

Архимандрит Дорофей,

игумен обители Фемелы.

 

Святая чудотворная икона Пресвятыя Богородицы «Хрисафитисса»

в серебряной ризе

 

МОЛЕБНЫЙ КАНОН КО СВЯТЕЙ ИКОНЕ БОГОРОДИЦЕ, ИМЕНУЕМОЙ

ХРИСАФИТИССА

 

Сей всечестной и чудотворный образ приял особую благодать исцелять страждущих от психологических и неврологических проблем и печалей.

Праздник в честь сия святыя иконы совершается в понедельник Фоминой недели.

 

(Творение монахини Исидоры Агиерофеитиссы, игумении обители святого Иерофея).

 

Священник: Благословен Бог наш всегда, ныне и присно и во веки веков.

Чтец: Аминь.

Псалом 142

Господи, услыши молитву мою, внуши моление мое во истине Твоей, услыши мя в правде Твоей. И не вниди в суд с рабом Твоим, яко не оправдится пред Тобою всяк живый. Яко погна враг душу мою, смирил есть в землю живот мой; посадил мя есть в темных, яко мертвыя века. И уны во мне дух мой, во мне смятеся сердце мое. Помянух дни древния; поучихся во всех делех Твоих, в творениих руку Твоею поучахся. Воздех к Тебе руце мои, душа моя яко земля безводная Тебе. Скоро услыши мя, Господи, исчезе дух мой; не отврати лица Твоего от мене, и уподоблюся низходящим в ров. Слышану сотвори мне заутра милость Твою, яко на Тя уповах; скажи мне, Господи, путь, воньже пойду, яко к Тебе взях душу мою. Изми мя от враг моих, Господи, к Тебе прибегох. Научи мя творити волю Твою, яко Ты еси Бог мой; Дух Твой Благий наставит мя на землю праву. Имене Твоего ради, Господи, живиши мя; правдою Твоею изведеши от печали душу мою. И милостию Твоею потребиши враги моя, и погубиши вся стужающия души моей: яко аз раб Твой есмь.

 

И затем:

Бог Господь и явися нам, благословен Грядый во имя Господне.

(четырежды)

 

Далее тропари.

Глас 4. Подобен: Вознесыйся на Крест волею.

Херувим и серафим без сравнения честнейшая ты еси, Дево, яко Бога носившая руками материнскими. Сего ради в хвалениях Тя, по долгу воспеваем: Радуйся, Хрисафитисса, вселенныя стено, немощствующих велий врач, ниществующих богатство благознаменное.

Слава. Подобен.

Молебно к Твоей иконе припадаю, о Хрисафитисса, Дево Мария, и взыскую благоволения Твоея помощи: укрепление благосострадательное от болезней даруеши, страсти исцеляюще душ и телес. Скорбящим бо ты еси надеждо, обуреваемым пристанище тихообразное. 

И ныне. Богородичен. Подобен.

Не умолчим никогда, Богородице, силы Твоя глаголати, недостойнии. Аще бо Ты не бы предстояла молящи, кто бы нас избавил от толиких бед, кто же бы сохранил доныне свободны? Не отступим, Владычице, от Тебе: Твоя бо рабы спасаеши присно от всяких лютых. 

Чтец.

Псалом 50. 

Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя; яко беззаконие мое аз знаю, и грех мой предо мною есть выну. Тебе Единому согреших и лукавое пред Тобою сотворих, яко да оправдишися во словесех Твоих, и победиши внегда судити Ти. Се бо, в беззакониях зачат есмь, и во гресех роди мя мати моя. Се бо, истину возлюбил еси; безвестная и тайная премудрости Твоея явил ми еси. Окропиши мя иссопом, и очищуся; омыеши мя, и паче снега убелюся. Слуху моему даси радость и веселие; возрадуются кости смиренныя. Отврати лице Твое от грех моих и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего и Духа Твоего Святаго не отыми от мене. Воздаждь ми радость спасения Твоего и Духом Владычним утверди мя. Научу беззаконыя путем Твоим, и нечестивии к Тебе обратятся. Избави мя от кровей, Боже, Боже спасения моего; возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен; сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая; тогда возложат на oлтарь Твой тельцы.

Канон ко Пресвятой Богородице, глас 4.

Песнь 1.

Ирмос: Воду прошед яко сушу, и египетскаго зла избежaв, изрaильтянин вопияше: избaвителю и Богу нашему поим.

Припев: Пресвятая Богородице, спаси нас.

Дворец славы златозарныя, всесияющий троне всех Создателя, Чистая Хрисафитисса Дево, добродетелей красотами мя осияй.

Припев: Пресвятая Богородице, спаси нас.

Ангелов славо и радосте, досточтимая Богородице Хрисафитисса Мариам, от печали страстей свободи мя и небесныя радости мя удостой.

Слава Отцу и Сыну и Святому Духу.

Спящу ми в ночи страстей и во тьме неведения преткновенно бредущему, руце Твои матернии мне простри и разум мой просвети, Хрисафитисса.

И ныне, и присно, и во веки веков. Аминь.

Ликуй и веселися, вся земля, красуйся во славе, Церковь Христова, яко богатство имаши – икону Хрисафитиссы Девы, юже вси почитаем.

Песнь 3.

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желaний крaю, верных утверждение, едине Человеколюбче.

Припев: Пресвятая Богородице, спаси нас.

Радуяся, вопием: радуйся, чистая Владычице; радуйся, Хрисафитисса, Дево богорадованная; радуйся, живота сокровище, благословения богатство, милости море неисчерпаемое.

Припев: Пресвятая Богородице, спаси нас.

Врач в болезнех и душевных страстех, и в тяжких немощех, скорбящих же быстрая Помощнице в нуждах бываеши, сострадательная и милосердая, о Хрисафитисса.

Слава Отцу и Сыну и Святому Духу.

Воспевают благославную славу Твою и преизрядную честь Твою, о Хрисафитисса, Ангелов лики, ихже несравненно превышаеши, и вернии, дивящеся величиям Твоим. 

И ныне, и присно, и во веки веков. Аминь.

Победителя смерти, Иисуса рождшая, разрушаеши горечь Евину многоплачевную и вечныя жизни, о Хрисафитисса Мати, общника поставила еси паки человека.

 

Исцели наши болезни телесныя и скорби, и страсти душевныя, Чистая Хрисафитисса, и милость даруй молящимся.

Призри благосердием, всепетая Богородице, на мое лютое телесе озлобление, и исцели души моея болезнь.

Священник поминает о здравии.

 

Затем седален глас 2. Предстательство теплое… 

Образу Твоему, Дево Хрисафитисса, припадаю верно, и вопию из глубин моих: рукою Божественною Твоею милости даруй мне, Владычице, и душевных мя избави страстей, укрепление обоюдое ми даруя.

 

Песнь 4.

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Припев: Пресвятая Богородице, спаси нас.

Хрисафитисса непорочная, скорбящих надеждо утешительная, плачущих утешение, призри на мя и спаси мя.

Припев: Пресвятая Богородице, спаси нас.

Изречения исполнишася пророков, о Хрисафитисса, на Тебе: родила бо еси Бога и нетленна пребыла еси.

Слава Отцу и Сыну и Святому Духу.

Высоким проповеданием придите, возвеличим, о боголюбцы, Деву Хрисафитиссу и превознесем Тоя чудеса.

И ныне, и присно, и во веки веков. Аминь.

Тебе колена преклоняем души и тела, Хрисафитисса, и с верою вопием ти: от обстояний нас избави.

 

Песнь 5.

Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Припев: Пресвятая Богородице, спаси нас.

Удивляюся красоте Твоей, пресвятая Хрисафитисса честная, и восхваляю многую Твою благость.

Припев: Пресвятая Богородице, спаси нас.

Исчезают врагов невидимых нахождения и сих тлетворныя напасти помощию Твоею, Всесвятая Хрисафитисса.

Слава Отцу и Сыну и Святому Духу.

Милостива нам Сына Твоего, Хрисафитисса Богородице, молитвами материнскими сотвори всем, любовию почитающим Тя.

И ныне, и присно, и во веки веков. Аминь.

Кто из земнородных по достоянию изречет славу Твою, Хрисафитисса честная, или кто воспоет честь Твою избранную?

 

Песнь 6.

Ирмос: Молитву пролию ко Господу и Тому возвещу печали моя, яко зол душа моя исполнися, и живот мой аду приближися, и молюся яко Иона: от тли, Боже, возведи мя.

Припев: Пресвятая Богородице, спаси нас.

Да узрят красоту Твою, Владычице Хрисафитисса, Дево Мария, ангельских воинств лики, и о тебе радостию возвеселятся. Подобно и вся отечествия языков радостно возликуют.

Припев: Пресвятая Богородице, спаси нас.

Луну тя светлую ведаем, Хрисафитисса чистая Богородице, божественное сияние умнаго Солнца, восток же невечерняго дне, златой светильник и светлый, Светодателя Христа бо родила еси.

Слава Отцу и Сыну и Святому Духу.

Согласно Тебе похвальныя песни, Всечистая, вернии возглашаем: радуйся, жизни вечныя хранилище, благословения великая главо, источниче божественных дарований, Хрисафитисса всезлатая Владычице.

И ныне и присно и во веки веков. Аминь.

Во объятиях матерних твоих носила еси всех Творца и Владыку, сего ради Херувимский престол показалася еси, Хрисафитисса Дево, Мати Божия, и лествица к небесем, легко человеков возводящая.

Исцели наши болезни телесныя и скорби, и страсти душевныя, Чистая Хрисафитисса, и милость даруй молящимся.

Чистая, словом Слово неизреченно в последняя дни рождшая, умоли, яко имущая матернее дерзновение.

 

Священник снова поминает.

 

Седален. Глас 2 

Защитница христиан. 

Со страхом ко всетвердому предстательству Твоему прибегающе, всехудые и недостойные, вопием молебно и взываем к Тебе: услыши наша молитвы, о Хрисафитисса чистая, всесвятая Богородице, исцели рукою Твоею болезни немощствующих и от страстей душевных рабы Твоя свободи.

Прокимен.

Помяну имя Твое во всяком роде и роде. (дважды)

Стих. Слыши, Дщи, и виждь, и приклони ухо Твое, и забудь народ Твой и дом отца Твоего, и возжелает Царь доброты Твоея.

Помяну имя Твое во всяком роде и роде.

 

Далее иерей: Премудрость прости…

 

От Луки святаго Евангелия чтение.

Во дни оны, воставши, Мариам, иде в горняя со тщанием, во град Иудов. И вниде в дом Захариин, и целова Елисавет. И бысть яко услыша Елисавет целование Мариино, взыграся младенец во чреве ея, и исполнися Духа Свята Елисавет. И возопи гласом велиим, и рече: благословена Ты в женах, и благословен плод чрева Твоего. И откуду мне сие, да прииде Мати Господа моего ко мне? Се бо, яко бысть глас целования Твоего во ушию моею, взыграся младенец радощами во чреве моем. И блаженна Веровавшая, яко будет совершение глаголанным Ей от Господа. И рече Мариам: величит душа Моя Господа, и возрадовася дух Мой о Бозе Спасе Моем. Яко призре на смирение Рабы Своея, се бо, отныне ублажат Мя вси роди. Яко сотвори Мне величие Сильный, и свято имя Его. Пребысть же Мариамь с нею яко три месяцы, и возвратися в дом Свой.

 

Затем Глас 2. 

Слава Отцу и Сыну и Святому Духу.

Молитвами Хрисафитиссы, Милостиве, очисти множество согрешений наших.

И ныне и присно и во веки веков. Аминь.

Молитвами Богородицы, Милостиве, очисти множество согрешений наших.

Стих: Помилуй мя, Боже, по велицей милости Твоей и по множеству щедрот Твоих очисти беззаконие мое.

Подобен. Глас 2. Все отложивше попечение…

Мир величает и Христова Церковь радостью веселится о честней иконе Твоей, Хрисафитисса, от неяже богатство чудес истекает и исцеления изливаются: плотские болезни и душевные страсти разрешаются. Щедрейше же злата благодеяния струятся всем почитающим любовию святой Твой образ и призывающим всегда Божественное имя Твое.

Никто же притекаяй к Тебе постыжден от Тя исходит, чистая Дево Богородице, но испрашивает благодать и приемлет дарование к полезному прошению.

Утешение скорбящим, облегчение болящим явилася еси, Богородице Дево, спаси град сей и народ, враждующим примирение, обуреваемым тишина, единая защита верных.

 

Иерей: Спаси, Боже, народ Твой…

 

Песнь 7.

Ирмос: От Иудеи дошедше отроцы, в Вавилоне иногда, верою Троическою пламень пещный попраша, поюще: отцев Боже, благословен еси.

Припев: Пресвятая Богородице, спаси нас.

Трезвенным сердцем, чистою мыслью, святыми усты воспоем согласно непорочную Деву, чистую Хрисафитиссу, вопиюще ей песни радостныя.

Припев: Пресвятая Богородице, спаси нас.

Радостнозрачная Дево, человеческий род возвысившая от ада преисподняго к высоте Божественныя славы, Хрисафитисса Владычице, избави нас от искушений и скорбей житейских.

Слава Отцу, и Сыну, и Святому Духу.

Яко многоценное богатство дарований Божественных ведаем тя, о Христафитисса, якоже трапезу полную, Хлеб Жизни носящую, егоже причастившись, вернии, воспоем Твою благодать.

И ныне и присно и во веки веков. Аминь.

Красотою великолепия и диадемою чести неприступныя, и славы избранныя сияеши златом, Хрисафитисса, Владычице, и радуеши души, Тя ублажающих.

Песнь 8.

Ирмос: Царя Небеснаго, Егоже поют вои ангельстии, хвалите и превозносите во вся веки.

Припев: Пресвятая Богородице, спаси нас.

Се, предстояще пред святою Твоею иконою, Хрисафитисса, Непорочная Дево, воспеваем величия Твоя.

Припев: Пресвятая Богородице, спаси нас.

Тебе в нуждех, о Хрисафитисса Мати, прибегаем вопиюще, любовию, сокруши ловительства врагов злоумышляющих.

Слава Отцу, и Сыну, и Святому Духу.

Молитвами Сыну и Богу Твоему, Хрисафитисса Дево, Девице, даруй людем Твоим велию милость.

И ныне и присно и во веки веков. Аминь.

Приидите, руками радостно плещуще, восхвалим вси благодать Хрисофитиссы, Богородицы Девы.

 

Песнь 9.

Ирмос: Воистинну Богородицу Тя исповедуем, спасеннии Тобою, Дево Чистая, с безплотными лики Тя величающе.

Припев: Пресвятая Богородице, спаси нас.

Яко имущая матернее дерзновение, Дево, ко Владыце всех, Того умоли о людех озлобленных, о Хрисафитисса.

Припев: Пресвятая Богородице, спаси нас.

Витий благоглаголивых уста молчат и не могут возглаголати рождества Твоего непостижимый образ, о Хрисафитисса.

Слава Отцу, и Сыну, и Святому Духу.

Непостижима красота Твоего благолепия и образ Твой прекрасен, услаждающий Ангелов лики, о Хрисафитисса Дево.

И ныне, и присно, и во веки веков. Аминь

К Тебе с верою прибегает род человеческий, о Хрисафитисса Мати, и вопиет тепло: «Даждь нам богатство милосердия Твоего».

 

Достойно есть, яко воистину, блажити тя, Богородицу, присноблаженную и пренепорочную, и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую сущую Богородицу Тя величаем.

 

И следующие величания.

Акростих: «Радуйся, Владычице»

Радуйся, Хрисафитисса Мариам, богатство нищенствующих, нуждающихся сокровище, радуйся, бедствующих укрепление и стено, пристанище в бурех необуреваемое.

Воспеваю, Хрисафитисса Мариам, твоя величия, велия и чудная, люблю доброту Твою, славлю Твою славу, возношу многое Твое велелепие.

Воспеваем множество земнородных Хрисафитиссы всесвятыя дарования, яже благодатно требующим дарует, и милость от Нея почерпаем.

Шипок девства златолепный, цвет чистоты Хрисафитисса избранный, сад благодатей прекрасный добродетелей ты еси и радуеши всех благодатию.

Благо тебе провозглашаем чудесами Дево Богородице Хрисафитисса Мариам, Ты бо вышшая суще Ангелов, Твари всякия превышшая.

Приидите с верою и тщанием притецем со вниманием ко образу святому Хрисафитиссы Девы Богородицы, Ея милосердие призывающе.

Воздвигни руце Твои к Богу, Сего умоляюще Хрисафитисса матерски, дати болезнем исцеление обоюдое, утешительная надеждо скорбящих.

Днесь земля и небо единое благозвучие духовное составляют, и Богородицы славу воспевают, вопиюще Ей, радуйся, о Хрисафитисса.

Киими похвалами, киими песнми воспою по достоянию Хрисафитисса Мариам, превеликие и божественные чудеса, ихже ради Бог достойно Тя возвеличи?

Всем сердцем моим, со всею надеждою моею и от всего тщания моего, Тебе со дерзновением всегда прибегаю, помози ми, вопию Тебе, о Хрисафитисса. 

Исцеление даруеши душевное, здравие же телесе Хрисафитисса Мариам и сострадания добрую благость, яко Мати милости всесострадательныя.

Источницы, и горы и холмы да точат сладость радости, Хрисафитиссы Девы Всесвятыя почитающе день всерадостный.

Владыку всех и Творца носила еси на объятиях, Хрисафитисса Мариам, сего ради ангельския чины превзошла еси, с ними же изрядно радуйся, воспеваем.

Радуйся, Хрисафитисса Мариам, Монемвасии защита теплая, радуйся, дарующая исцеления просящим, радуйся, скорбящим утешение.

Затем:

Вся Ангелов воинства, Предтече Господень, апостолов двоенадесятице, святии вси с Богородицею, сотворите молитву, во еже спастися нам.

Чтец: Трисвятое по Отче наш.

 

Аполитикион.

Глас 1. Пустынный житель.

Яко богатство златое, честнейшую имамы Твою достопокланяемую икону, Мариам Хрисафитисса, из нея же истекает, яко злато, чудес преславных множество, ибо исцеляеши страсти душевныя и болезни телесныя. Радуйся, милосердия реко, радуйся, милости море, радуйся благословения источниче и благодати поток приснотекущий.

 

Затем. Ектения и Отпуст.

Перед Молитвами святых отец… следующее:

 

Глас 2. Егда от Древа…

Радуйся, досточтимая Хрисафитисса, здравие болящих, воюющих сило, богатство неиждиваемое бедных, надеждо сущих в печали, пристань обураваемых, стено и укрепление гонимых. Радуйся благ вместилище, источниче богатыя милости, сочувствия море неисчерпаемое.

Имать Церковь Христова яко позлащенное сокровище честную Твою икону, Девице Хрисафитисса, Богорадованная, яко из нея проистекают потоки чудес, болезни исцеляются, душевныя и телесныя. Ей припадающе с любовию, к Тебе, милостивей защитительнице, с верою все молим Ти ся.

Приидите славные иереи, увенчаем вернии Деву и Богородицу Чистую, с радостию поюще: о Хрисафитисса, Госпоже сотворенных, Ангелов Святых славою без сравнения превышающая. Радуйся, блистающая паче злата, добродетельми преиспещренная, ризами златыми одеянная.

Всю надежду мою на Тя возлагаю, Мати Божия, сохрани мя под кровом Твоим.

  

МОЛИТВА ПРЕСВЯТОЙ БОГОРОДИЦЕ

ОБ ОСТАВЛЕНИИ ГРЕХОВ И ПОМОЩИ В СКОРБЕХ 

Творение Иоанна Евгеника, диакона, брата Марка Ефесского

О Пречистая Дево, приими моление сие, се бо лучшаго приношения не имам, ниже возмогу найти и принести Тебе инаго, славнейшаго и божественнейшаго словесе. Богомати Приснодево, Чистая и Всенепорочная, и Пренепорочная, и разумом, и словом, и духом, и телом Твоим святым, Чистое и Пренепорочное Слово Божие, Господа нашего Иисуса Христа, безплотна и безтелесна бывша, от Твоих преславных кровей, плотию облекшая, и воистину плоть человечу Ему даровавшая, и чудесно Бога Слова ради добродетельми всех превзошедшая, освященным жилищем Ему ставшая, нас ради человек и нашего ради спасения, дабы преклонились на милость небеса и снизошли со благоволением к бедам нашим. Богородице Всенепорочная, Чистейшая и Неблазная, словом, нравом и житием, чистотою все творение превосходящая паче, нежели может вместити разум человечь; Богородице Всечестная, Богородице Всепетая, господоименитая, многоименитая и великоименитая, вся преозаренная, вся освященная, вся благодатная, Мати Неневестная и Богоматерная Дево, ширшая Небес и солнца ярчайшая, честнейшая всея твари, святейшая Херувим и славнейшая Серафим, Ангелов Владычице и Госпоже мира, Благая и Всеблагая, преблагое вместилище Единаго Благаго и Всеблагаго Бога. Милостивно приими сие малое и смиренное благодарение, поклоняемая и прославляемая всем творением вовеки и над всем имущая власть. Благосклонно приими молитву раб Твоих, яко сродница еси человеков, ведаеши немощи природы нашея, и человеколюбиво на нас призираеши и милостивно нас посещаеши. Услыши мя, сладчайшая Владычице моя, Пресвятая Богородице, богоукрашенная и богоблагодатная, кроткая нравом, богоподражательная, и радость, и благоволение, и смирение имущая, и во веки одесную Всемилостиваго и Благаго Бога во свете предстоящая Царице, в одеяниях позлащенных добрететельми священными, и многочисленными дарованьми Святаго Духа преукрашенная; всеми владычествующая и везде пребывающая, вся Тебе возможна суть, яко Всемогущаго Бога Матерь. Всех, к Тебе в нужде прибегающих, ободряеши и искушений свобождаеши, скорби избавляеши.

Облегчи, молю, Владычице, бремя тяжкое греховное и помилуй мя грешнаго и непотребнаго раба Твоего, яко напасти житейския и искушения отовсюду мя обыдоша, слез потоком омой многая и лютая беззакония моя. Агнца Божия Рождшая, вземлющаго грехи мира, исцели мой ум, помыслы греховными ослеплямь, даруй сердцу моему сокрушение, а очам источник покаянных слез, и печаль мою на радость преложи.

Свободи мя, Владычице моя, Пресвятая Богородице, от всякия печали и от соблазнов лукаваго, и от нестерпимых мірских искушений, яже прилежат ми даже от юности моея, и сердце мое, присно страждущее, всякия изми муки, от печалей избави и свободи. О, Сладчайшая Утешительнице мира, Надеждо ненадежных, Защито беззащитных, страхом Божиим и любовию души верных напояющая и от всякаго обстояния и уныния их исцеляющая, богатством милости Твоея скорби моя услади.

Доколе, Всеблагая моя Владычице, призывати на помощь буду, оставаясь неуслышан? Вопию и никтоже внемлет мне? Достойная по грехом моим приемлю, Богомати Всенепорочная, яко от склонности ко греху и навыка к беззаконию, аз всезлобным врагом присно побеждаемь и во власти его нахожусь. Возстани на моление супротив обстояния вражия, простри силу Твою против козней его лукавых. В безмятежие, мир и свет обрати бурю, мя потопляющую, и тьму, мя обдержащую. Присно защити, всякий помысел мой, всяко слово и дело мое ко благому обращая, и всего мя освящая и просвещая, и всегда к добродетели мя направляя, и благую и всесвятую волю Сына Твоего и Бога моего исполняти и творити ревностно побуждая, к соблюдению Его животворящих заповедей укрепляя и нерадения мя свобождая. Спаси мя, Владычице моя Богородице, и Царствия Небеснаго моленьми Твоми удостой, да всегда прославляю Тебя, Препрославленную и Преблагословенную, во веки веков. Аминь.

 

КОНЕЦ

И БОГУ НАШЕМУ,

ВСЕХ БЛАГ ПОДАТЕЛЮ, ВОЗДАДИМ

ЧЕСТЬ И ХВАЛУ,

ВО ВЕКИ ВЕКОВ.

АМИНЬ.

 

@«Трость Скорописца», 2022 г.

Благодарим всех тех, кто перепечатывает наши материалы и при этом указывает ссылку на данный блог, показывая этим уважение к труду переводчика. И благодарим тех, кто не указывает, а выкладывает как свои собственные. Да благословит всех нас Господь! Слово Божие пусть сеется обильно.