Тропарь, кондак, канон преподобному Максиму Кавсокаливиту, Афонскому. 13/26 января.

 

Преподо́бный Макси́м Кавсокаливи́т, Афо́нский

День памяти: 13/26 января

 

Тропáрь, глас 5.

От мáтерния утро́бы, преподо́бне Макси́ме, / я́ко сосу́д избра́нный Бо́гу посвящéн еси́, / зрéти божéственный и непостижи́мый свет, / я́коже Моисéй, сподо́бился еси́, / и прозрева́ти гряду́щее, я́коже и вели́кий во проро́цех Самуи́л, / Афо́на божéственное чу́до, Богоро́дицы служи́телю, / Юже моли́, о́тче, о душа́х на́ших.

Кондáк, глас 8.

С неви́димыми чи́нми а́нгелов сочета́ясь, / сво́й до́брый пу́ть на земли́ сверши́л еси́, / и небéсное улучи́л еси жили́ще, / и от Божéственныя руки́ венéц побéды прия́л еси́. / От вся́ких у́бо мя бед свободи́, да зову́ ти: / Ра́дуйся, Макси́ме преподо́бне!

Кано́н свято́му преподо́бному Макси́му Кавсокаливи́ту.

Припев: Преподо́бне о́тче Макси́ме, моли́ Бо́га о на́с.

Песнь 1. Глас 8.

Ирмос: Колесницегони́теля фарао́ня погрузи́, / чудотворя́й иногдá / Моисéйский жезл, крестообрáзно порази́в, / и раздели́в мо́ре: / Изрáиля же беглецá, пешехо́дца спасé, / песнь Бо́гови воспевáюща.

Порабощéн сластьми́ телéсными ум мой, но Твоему́ престо́лу приседя́щая, Человеколюбче, Прему́дрость да споспешеству́ет ми, Сло́ва благодáть дающи, éюже прослáвити возмогу́ Макси́ма Твоего́ предо́браго.

От небесé святáя хвалá тебé, О́тче, подобáет, áнгельская песнь, я́ко áнгелов собесéднику, Тро́ице Всепреблагáя, поющих Тя спаси́, Твоего́ служи́теля Макси́ма ходáтая поющим сотвори́.

Чи́стое жи́тельство иму́ще, преподо́бне, от исто́чника Бо́жия áнгельское питиé, Ду́ха Святáго, испи́в, дéмонов полки́ уязви́л, Макси́ме всему́дре, помяни́ нас, тя поминáющих.

Богоро́дичен: От Тебé воплоти́вшагося Бо́га познáхом, Всепéтая, я́ко еди́на благáя, от врагá исхити́, и рабá и́стиннейшаго, дéлы благи́ми, Живодáтелю мя сотвори́, я́ко Тя по до́лгу величáю.

Песнь 3.

Ирмос: Небéснаго кру́га Верхотво́рче, Го́споди, / и Цéркве Зижди́телю, / Ты менé утверди́ в любви́ Твоéй, / желaний крáю, вéрных утверждéние, / Еди́не Человеколюбче.

Свящéннейшими и сия́тельными, плáменными твои́ми словáми, просвети́лось отцéв мно́жество, и я́ко тáинник Христо́в, цáрие и кня́зи припáдали пред тобо́ю, всеслáвный о́тче Макси́ме.

У́м владыку на стрáсти пáгубныя постáвив, полк враго́в возстающих, си́лою Крестá, неви́димых победи́л еси́, то́лпы дéмонов порази́в, Макси́ме, о́тче наш всеблажéнне.

Небошéствующим от земли́ богоно́сным Отцéм, я́ко по учéнию, тáко и по о́бразу подражáл, с ни́миже и Христо́с во оби́тели тя водвори́, да рáдуешися на небеси́ в божéственных черто́зех, преслáвне.

Богоро́дичен: Се прéйде тень с прихо́дом И́стины, Христá от Дéвы ро́дшагося, Всеси́льне Спáсе, Твоея́ Мáтери мольбáми, спаси́ ны, Ми́лостиве, и моли́тву Макси́ма приими́.

Седáлен, глас 4. 

От мирскáго смятéния и суеты, му́дре, удали́лся, жития́ пучи́ны избежáв, причáлил к Горé Афон божéственней, и я́коже Моисéй на иной горé Синáй, или́ же Илия́ на Карми́ле божéственнем, получи́л извещéние от Го́спода, богоизбрáнный, от Дéвы: Юже моли́ о рабéх твои́х, творя́щих пáмять твою.

Сла́ва, и ны́не: Егда́ предста́ну пред лице́м Созда́теля моего́ в де́нь пра́веднаго суда́ Его́, тогда́, Влады́чице, предста́тельствуй за мене́, и му́ки изба́ви мя́ ве́чныя, да не сни́ду во а́д, но да спасу́ся Твои́м, Пресвята́я Богоро́дице, заступле́нием.

Песнь 4.

Ирмос: Ты моя́ крéпость, Го́споди, / Ты моя́ и си́ла, / Ты мой Бог, Ты мое рáдование, / не остáвль нéдра О́тча / и нáшу нищету́ посети́в. / Тем с проро́ком Авваку́мом зову́ Ти: / си́ле Твоéй слáва, Человеколюбче.

Проповéдником Христá вели́кий содéлася Пáвел, божéственную благодáть прия́в духо́вную, и живу́ю ро́су краснорéчия на мир излия́в, от сих же прия́т и Макси́м, зако́нно подвизáясь на Афо́не в по́двизех духо́вных, о нас моли́ся во вéки ко Го́споду.

Реки́ даровáний духо́вных испо́лнился Макси́м боговдохновéнный, и царéй, и прави́телей мно́зих, всех вразумля́ше, не твори́ти непрáвду совершéнно глаго́лаше, и́бо ми́ловати прося́щих у́чит вéрных Христо́с, благоприя́тно их послу́шающе.

Горé стремя́сь, непрестáнную хвалу́ произнося́ще, слáву еди́ну, трисвéтлое сия́ние, я́ко Царю áнгели Бо́жии, Максим, и́же уви́де ми́ра сего́ приврéменная, поспéшно бежáше, и плоть умерщвля́я, в небéсныя взыде оби́тели.

Богоро́дичен: Невéсто Бо́жия, Ты у́бо су́щи всепéтая, мир весь и́матъ Твоé заступлéние, я́ко Христá Мáтерь вои́стинну, моли́ непрестáнно за нас, воспевáющих Тя, к Нему́же с Макси́мом взывáти не преставáй, подáти прегрешéний оставлéние.

Песнь 5.

Ирмос: Вску́ю мя отри́нул еси́ / от лицá Твоего, Свéте Незаходи́мый, / и покрыла мя есть чу́ждая тьмá, окая́нного, / но обрати́ и к свéту зáповедей Твои́х / пути́ моя́ напрáви, молюся.

Я́ко от во́ска мед, ко спасéнию врачевство́ услади́ша, свéтлыя твоя́ словесá и от исто́чника животеку́щаго учéния, я́ко душ божéственный врачевáтель, о́тче Макси́ме, не престáй моли́тися ко Го́споду.

Тáинства вышняя ви́дех и преслáвная, препо́добне Макси́ме, и от земных трудо́в, небéсныя обрето́х оби́тели, сего́ рáди, о́тче, и моли́твенник за всех яви́ся, и тéплый ходáтай ко Го́споду.

Отвéрзи о́чи моя́ у́мныя, Владыко, Спаси́телю мой милосéрдый, и приведи́ мя от мрáка к свéту невечéрнему, и Твоего́ Макси́ма моли́твами, поми́луй мя, молю Тя, Человеколюбче Го́споди.

Богоро́дичен: Стрáнное вои́стинну чу́до зачáтия Твоего́ и неизъясни́мое, Всечи́стая, я́ко Творцá и Бо́га ро́ждшая, и Дéва пребывáеши. Исповéдую во и́стине и слáвлю Христá, Спаси́теля моего́.

Песнь 6.

Ирмос: Моли́тву пролию ко Го́споду / и Тому́ возвещу́ печáли моя́, / я́ко зол душá моя́ испо́лнися / и живо́т мой áду прибли́жися, / и молюся, я́ко Ио́на: / от тли, Бо́же, возведи́ мя.

Се то́лпы мно́зи к преподо́бному прихождáху, зрéти его́ и глаго́лати, и тех осия́л чудесáми преслáвными, до концá им и́стину реку́ще.

Далéче пребывáет от Бо́га непрáведный и клевéщущий, сия́ прему́дро глаго́лет Макси́м преподо́бный, Христо́с же Госпо́дь, его́ святыми моли́твами, содéйствует во блáго.

Порабо́тих держáвно стрáхом Бо́жиим Макси́м вся стрáсти телéсныя, ду́ху пло́ть подчини́в, сего́ рáди восшéл от дея́ния к созерцáнию возлюбленнаго Го́спода.

Богоро́дичен: Вся́кия напáсти, Чи́стая, рабо́в Твои́х свободи́, дéмонов вся́кия си́лы, зло́бы же людски́я, Дéво, спаси́ от их вредоно́снаго дéйства, Тя прославля́ющих, Всепéтая.

Кондáк, глас 8.

С неви́димыми чи́нми а́нгелов сочета́ясь, / сво́й до́брый пу́ть на земли́ сверши́л еси́, / и небéсное улучи́л еси жили́ще, / и от Божéственныя руки́ венéц побéды прия́л еси́. / От вся́ких у́бо мя бед свободи́, да зову́ ти: / Ра́дуйся, Макси́ме преподо́бне!

Икос.

Я́ко áнгел в телеси́ су́щи, о́тче, преестéственным житиéм безпло́тным си́лам уподо́бился еси, на незри́мых враго́в крéпце подвизáющася тя зря́ще, чу́ду сему́ диви́мся, вопия́ше тебе таковáя:

Рáдуйся, я́ко тобо́ю сатанá уязви́ся;

Рáдуйся, я́ко тебé рáди Бог возрáдовася.

Рáдуйся, вéтхаго Адáма совлéкшийся;

Рáдуйся, в но́ваго Христá облéкшийся;

Рáдуйся, на высоту́ неудопостижи́мую добродéтелей возшéдый;

Рáдуйся, глубины смирéния удо́бно дости́гнувый;

Рáдуйся, по́двигом до́брым подвизáвшийся;

Рáдуйся, вино́вника зло́бы низвéргнувший.

Рáдуйся, свéта божéственнаго обитáлище;

Рáдуйся, свéтлое вéры утверждéние.

Рáдуйся, тéсным путéм евáнгельским шéствовавый;

Рáдуйся, широты небéсныя дости́гнувый.

Ра́дуйся, Макси́ме преподо́бне!

Песнь 7.

Ирмос: От Иудéи дошéдше, о́троцы / в Вавило́не иногдá, / вéрою Тро́ическою плáмень пéщный попрáша, поюще: / отцéв Бо́же, благословéн еси́.

Глаго́лов звучáние твои́х во всю зéмлю я́ко глас вéлий изыде, изумевáюще человéков, слышащих о делéх твои́х преслáвных, воспевáемый Макси́ме, да возопии́м: отцéв Боже, благословéн еси́.

Но́вый Рай, божéственное богáтство даровáний Бо́жиих тебé низпослáся, вéрно тя слáвим, всеблажéнне Макси́ме, отцéв похвало́, и да воспои́м: отцéв Бо́же, благословéн еси́.

Прему́дрости вышния, и́стинно возжелáв непоро́чныя, му́дре, у́зким же рéвностно послéдовал путéм и неукло́нно шéствовал еси́, спаси́ нас моли́твами твои́ми, Макси́ме, поющих: отцéв Боже, благословéн еси́.

Богоро́дичен: Спаси́, Всечи́стая, и избáви вся́кия му́ки и зло́бы врáжия, вéрою вопиющих: Христé, Спаси́телю мой, не остáви мя, моли́твами Богоро́дицы, взывáюща си́це: отцéв Бо́же, благословéн еси́.

Песнь 8.

Ирмос: Седмери́цею пещь / халдéйский мучи́тель / Богочести́вым неи́стовно разжжé, / си́лою же лу́чшею спасéны, сия́ видев, / Творцу́ и Избáвителю вопия́ше: / о́троцы, благослови́те, / свящéнницы, воспо́йте, / людие, превозноси́те во вся вéки.

С небесé сия́ют два свети́льника ярчáйшии, всех послéдовавших за ни́ми озаря́ющии, и ещé на земли́ испо́лнившиися божéственнаго свéта: божéственныя Лáвры духо́вный во́ждь, и поджигáтель кали́в, два свети́ла, осиявáющие друг дру́га и совоспевáющие вмéсте: людие, превозноси́те Христá во вся веки.

Рáдуйся, вселéнныя похвало́, рáдуйся, Макси́ме преподо́бне, рáдуйся и́стины нело́жный защи́тниче, ми́ра сего́ приврéменнаго избежáл, плоть распинáя со страстьми́ и похотьми́ воздержáнием о Го́споде, вышняго Цáрствия наслéдником стал, вопия́ше: превозноси́те Христá во вся вéки.

Моисéй пéрвее еги́птян порази́л, восприя́в свыше от Бо́га си́лу, тáкожде и Макси́м, преодолéв ко́зни врáжии, улучи́л вышних и вéчных благ, и Го́спода мо́лит за нас, воспевáющих: людие, превозноси́те Христá во вся вéки.

Богоро́дичен: Нас рáди, Всепéтая, божéственное снизхождéние яви́ся, нас рáди от Тебé во плоти́ роди́ся, и Тебя́, Пренепоро́чную, всем ходáтаицу показá. Славосло́вим Сына и Бо́га Твоего́, Его́же мо́лиши непрестáнно, с Макси́мом божéственным, Всецари́ца Мари́я, препрослáвленная.

Песнь 9.

Ирмос: Ужасéся о сем Нéбо, / и земли́ удиви́шася концы, / я́ко Бог яви́ся человéком пло́тски / и чрéво Твоé бысть прострáннейшее Небéс, / тем Тя, Богоро́дицу, / Áнгелов и человéк чиноначáлия величáют.

Женихá небéснаго ски́нию обрéл всехвáльный Макси́м. Го́споди, сохрани́ пáству его во вéки от злобы агáрян, искушéний и всяческих зол, я́ко Тебé умоля́ем: услыши в моли́тве служи́теля Твоего́, Человеколюбче.

Возвесели́ души́ моея́ состáв трехчáстный, моли́твами твоими, преслáвный Макси́ме, я́ко мо́щи твоя́ святыя суть фимиáм благоухáнный, и услáда небéсная, исто́чник мысленнаго Рáя. Моли́тися не преставáй о нас, о треблажéнне, ко преблаго́му Го́споду.

Просвещáется тéлом и душéю от Бо́га отцéв мно́жество, припáдающих, О́тче, к рáце мощéй твои́х честных, и с вéрою прибегáющие исполня́ются благоухáния духо́внаго, сего́ рáди тя про́сим: моли́ти о нас не преставáй, ублажáя Го́спода.

Пáче крина и кипари́соваго ми́ра, источáеши благоухáние ди́вное, егдá мы, прáзднующе пáмять твою честну́ю, с рáдостию вéлиею к тебé прибегáем, моли́сь непрестáнно о нас, приснопáмятне о́тче, ко Тро́ице, предстáтельствующи, всеблажéнне, молéнием тéплым ко Преблаго́му.

Богоро́дичен: Дéвственная и светоно́сная божéственная ски́ния, Всепренепоро́чная Мáти, припáдаю к Тебé и молю, стрáшнаго суда и огня бу́дущаго изми́ мя, Пречи́стая, яко благáя: Твои́м и Макси́ма тéплым предстáтельством умоли́те Человеколюбца.

Ексапостилáрий: Со ученики́ рáдовалася еси́…

В нéмощном тéле, Макси́ме, / соглáсно апо́столу Пáвлу, / сокро́вище Ду́ха Святáго вмести́л, / я́ко чи́стый сосу́д, даровáний испо́лнь. / Сей тя обрéт и в тебé почивá, / и тебé Свой Божéственный Свет показá, / богоно́сному и вернéйшему служи́телю Святыя Тро́ицы.

@Перевод «Трость Скорописца», 2021 г. Разрешается свободное распространение текста с указанием источника публикации.